सिन्धुली, २ कार्तिक । सिन्धुलीको मरिणमा जारी अखिल क्रान्तिकारी मरिण कप फुटबल प्रतियोगिताको उपाधी मरिण गाउँपालिका ६ को धमिले युवा क्लवले जितेको छ ।
नेकपा(माओवादी केन्द्र) निकट अखिल (क्रान्तिकारी) मरिण कमिटिद्धारा आयोजित प्रतियोगिताको आज भएको फाईनल खेलमा धमिले युवा क्लवले वाइसियल नेपाल जिल्ला कमिटि सिन्धुलीलाई पराजित गर्दै उपाधी जितेको हो ।
प्रतियोगितामा धमिले युवा क्लवले ३–० गोलअन्तरले वाइसियल नेपाल जिल्ला कमिटि सिन्धुलीलाई पराजित गरेको हो ।
जितसँगै धमिले युवा क्लवले एक लाख ११ हजार एक सय एघार रुपैयाँ नगद पुरस्कार सहित शिल्ड,मेडल र प्रमाण पत्र पाएको छ ।
प्रतियोगितामा उपविजेता भएको वाइसियल नेपाल जिल्ला कमिटि सिन्धुलीले ५० हजार ५ सय ५५ रुपैयाँ नगद पुरस्कार सहित शिल्ड,मेडल र प्रमाण पत्र पाएको छ ।
प्रतियोगिताका विजेता टिमलाई माओवादी केन्द्र मरिण गाउँकमिटिका अध्यक्ष काजीमान थिङ, मरिण गाउँपालिकाका अध्यक्ष विमर्श मोक्तानले संयुक्त रुपमा पुरस्कार वितरण गर्नुभएको छ ।
माओवादी केन्द्रको जनतासँग माओवादी विशेष रुपान्तरण अभियान अन्तर्गत प्रतियोगिताको आयोजना गरिएको हो ।
